Nang thlahna thu sawi leh ziak tur hian kei mi bawrhsawm hi ka insit a,ka theihna leh thiamna lah hian inchung pelh chu sawi loh kâwng pawh a thleng hek lo.Mahse ka sawi a,ka ziak loh chuan ka thisen zam leh lungphute hian min nawrin a inthum rawn tluk tluk tak si ah chuan Vahai rual awm khawm zinga vate hram pawh tluk dawn lo mah ila, vau a Tumbu khai leng i khwrh ang hmiang,puarna khawp nimah suh se Nauno chhunrâwl ngen awih tlei nan tal tiin kan thlasik mauchang puahchhuah ve phawng phawng tal a niang chu.
Kei Eden bawhchhiatna sual avanga Diabola thisena thlahchhawn țhanhnan ka nihna lak ata zalen ka nih ka inhriat ațanga țhatlai chen nana a aia thlanawm awmlohna KȚP huang ka dai luh ațanga vawiin ni thleng hian Phullen Branch tan hian Pa nih ilo van tlingzo teh lul em ! Branch pum huap meuh pawha ak zathnih hnuai lam nih pawh inhre lêklo a kutchi lo hawi hu hu rual keini ang duang tan pawha kan kam liam min dawnsawn sak a, bengkhawn peih mi, thu kal lam leh haw lam pawh hre hranglo khawpa mi bengtlalo keini ang i ke pen ruala min pen pui a,zawlkhata en a, min chelh tlat țhinte kha nghilh ni reng a awm tawh lovang. Branch khat committee ve meuh pawh kil khat ațanga țhiante hmui chung leh hnuai țhenhran phawk tir a thum huk țhin pawh min dawm thiam ziate dâwn kirin kawng dik ațang kawng țha leh zual min zawh puitu i lo ni .
Keini ang mahni meuh pawh insit tura mi tlawktlâwte thil tih leh sawi awmchhun faka, vawnloh chibai mai duh tawklo a anka nem biahthu hmanga fakna i chhakchhuah te minti chaktu leh phurna min petu a lo ni.Chung biahthu anka nemte chuan mitthla leh benga bu an khuarna hian kianin tik a nei tawh ngai lovang le.
Awle, a tawp nan ti hian duhsakna biahnem anka ka hlan ve nang che. Lalpa tana i țhat lai hun KȚP kal tlanga i rawngbawlna chuan mual lo liam dawn mahse Lusei lal ropuite zawh zaw zo iang mai lovin Lalpa leh a Kohhran tana i bul țanna tur leh i inchher hriamna lo ni zawk se, Van pasalțhate ianga Krista tana Thangchhuah diar khim ngei turin duhsakna ka hlan mawlh mawlh a che.
David Lalrinchhana
